22
08.2017

塞奶痛過生仔!新手母乳媽媽必備法寶~(通奶/預防塞奶方法!)

親子育兒(健康)  
一開始充滿決心要餵母乳半年既我,以為餵母乳係一件好簡單,最自然不過既事!但呢個半月已經深深感受到母乳媽媽有幾偉大 T^T...
 
由出世開始,因為個人既原因,蠔豉妹妹只係埋身食右邊,所以頭幾日我一直天真以為左邊無乜奶,但都有係咁二用手擠,但去到第3日,因為蠔豉妹妹太黃要留院照燈,我係超過12個鐘都無埋餵同泵奶既情況下,2邊都開始塞奶...但低b既我根本唔知塞左...只係覺得2邊都好漲,掂下先痛都無乜野就無理~到第7日,我終於頂唔住個痛要去睇助產士診所了...
 
去到既時候,助產士發現我2邊都已經塞到硬晒同埋體溫都偏高,佢話要幫我按摩同推返啲奶出黎,因為怕我乳線炎,叫我食2粒止痛藥先~我心諗,食左2粒止痛藥應該頂得住,大不了咪生嗰下咁痛!點知...我錯啦!好x痛!真係好x痛T^T...痛到我真係頂唔到...扯頭髮、大喊我都齊晒...嗰種痛係比生仔再痛多10倍!我無誇張...嗰下我真心覺得自己有抑鬱...我唔想再餵母乳,我想一秒收奶...我問自己做錯乜野點解要承受一次痛過生仔既痛...不過,助產士一路按我一路噴奶,之後按完又泵到好多奶後,我又唔捨得停餵母乳...明明我就有咁多奶可以俾蠔豉妹妹食,點可以咁易放棄!?好多媽媽想餵全人奶,不停追奶都未必夠奶量,我有咁多點可以停!
 
不過因為得右邊埋身餵,所以助產士都話左邊好易再次塞奶...所以都要好好注意!
 
以下有幾種可以預防塞奶/通奶既方法,雖然唔係一做就真係通晒,但起碼唔會再好似之前痛到大喊咁慘...希望幫到各位新手母乳媽媽!

 
1. 熱/凍敷
係餵奶/泵奶前用毛巾熱敷一下胸部,但要避開乳頭,敷1-2分鐘已經足夠~
而餵/泵完奶後就用凍毛巾敷返~
 
2. 按摩
一路餵/泵奶時可以一路按摩胸部,用少少力由外圍向乳頭方向按,目的係希望乳線通順~
如果覺得好難按,可以用椰子油幫下手~

 
3. 食卵磷脂
卵磷脂可以令母乳變得稀一啲,咁就易啲出奶~慢慢減少塞奶既情況。
係未塞前可以一日粒~
塞左既時候可以早晚各兩粒!總之一日唔可以多過4粒 :)
不過呢,因為會令母乳變稀,所以bb有機會更快餓~

 
4. 飲通草
煲通草其實好易~3錢通草加1升水,小火煲30分鐘就飲得~當然,淨通草水其實唔太好飲,所以我會將通草水加落豆漿到再煲滾先飲~
但因為通草都涼,一個星期飲一次好啦~
 
5. 阿b吸啜
如果只係少少塞奶,叫阿b啜5分鐘其實乜都通晒!
只要阿b既下巴對住塞嗰個位就ok~
好似我咁,平日阿b個下巴對住胸部既下方,所以胸部既下方我都無試過塞,只會塞胸部既上方...so sad...
6. 抗生素
之前第一次塞既時候,因為上面5樣我都keep住做,但仲有啲位係過左成個星期都未通返...加上體溫都keep住偏高,所以最後助產士轉介左我去醫生到開藥食1星期抗生素,但我食完1星期都仲未通晒,所以前後食左2星期...
當然食抗生素係最快好啦,不過因為抗生素會令母乳既味有所改變,有啲bb會因此唔鐘意食人奶...但好彩蠔豉妹妹無乜所謂,照食~所以都ok :)
雖然唔係做足頭5樣野就可以確保100%唔塞奶,不過有做好過無...好似我宜家咁,我左邊既胸部都有少少塞,不過只係少少痛,大力啲按返鬆都可以暫時阻止塞落去,食埋抗生素幾日就好好多,總之我唔想再經歷多一次痛到喊...如果再痛到喊,我估我都無勇氣再餵母乳落去...
 
雖然我仲未知我既決心去到邊日,不過~泵得一日得一日!因為見到蠔豉妹妹埋身食飽個傻樣真係好大動力!各位新手母乳媽媽一齊加油! :)

 

Facebook : 80後的人妻「旅」友 

邀稿 : wingring417@gmail.com / wingring@ymail.com

發表於2017.8.22
留言(0)
博客名稱 :
Pig Wing
網誌名稱:
Pig Wing's blog
使用天數:2,149
性別:
按月份瀏覽
    2020
  • 一月
  • 二月
  • 三月
  • 四月
  • 五月
    2019
  • 一月
  • 二月
  • 三月
  • 四月
  • 五月
  • 六月
  • 七月
  • 八月
  • 九月
  • 十月
  • 十一月
  • 十二月
>> 更多
系統分類
  • 美容時尚
  • 飲食烹飪
  • 環球旅遊
  • 親子育兒
  • 數碼科技
  • 生活品味
  • 寵物日誌
  • 攝影寫真
  • 文化政經
  • 其他
  • 台灣館
自行分類